Stóra Orðabókin

Meðal helstu hlutverka orðabóka er að vera notendum til leiðsagnar um orðaval í ræðu og riti og efnisskipan Stóru orðabókarinnar tryggir fjölþættari og virkari aðgang að slíku efni en í sambærilegum verkum. Hún sameinar í einu verki alhliða lýsingu á íslenskri málnotkun, þar sem orðin birtast í margs konar notkunarsamhengi, svo sem í orðasamböndum af ólíku tagi og samsetningum. Bókin skiptist í tvo meginhluta, annars vegar er sjálf orðabókarlýsingin með rösklega 13.000 flettiorðum, en hins vegar er sjálfstæð skrá um öll orðasambönd í orðabókartextanum, um 85.000 talsins. Aftast í bókinni er svo að finna lykilorðaskrár með enskum, dönskum og þýskum samsvörunum íslensku hugtakaheitanna sem greiða erlendum notendum leið að efni bókarinnar. Bókinni fylgir rafræn útgáfa á geisladiski sem býður upp á margvíslega leitarmöguleika sem ekki eru fyrir hendi í prentaðri orðabók.