1860-Sagan

Hljómsveitina 1860 þekkja eflaust margir í gegnum myndbandasíðuna Youtube. Sveitin hefur þá reglu að taka upp ný lög á æfingum og setja á netið. Þetta hefur vakið mikla lukku hjá netverjum og meira að segja landað strákunum útgáfusamning í Bandaríkjunum. Íslendingar fá þó forsmekk á sæluna þar sem nú er komin út fyrsta breiðskífa sveitarinnar, "Sagan", sem gefin er út af Konunglega siglingasambandinu og dreift af Record Records. Platan inniheldur þægilegt alþýðupopp af bestu sort, til að mynda lögin "Orðsending að austan" og "Snæfellsnes" sem hlustendur útvarpsstöðvanna ættu að þekkja.